Defensa personal

Al final, el sábadu pasáu tuvimos viendo La Vida es Bella. Hubo pa tolos gustos, a los que nun-yos gustó por ser mui triste, o por ser mui llarga.

Hoi tuvimos Defensa personal, utilizando les técniques del Krav Maga. Hubo poca participación en cuanto a cantidá, pero foi una actividá mui interesante y práctica. Saber como reaccionar si alguien te quier clavar un cuchillu, si t'agarren pol brazu, del pescuezu, de la tiesta...

Si tais interesaos en saber más sobre esto, pinchas aquí.

31 d'ochobre de 2009

Hoi, na sala d'usos múltiples de Soto Ribera a partir de les 17:00h: Tardes de cine en La Ribera.

Taller de reciclaxe

Ayer, vienres 30 d'ochobre, Rebeca vino al centru social de Soto Rei a facer un taller de reciclaxe. Ficimos una cartera perguapa con un tetrabrik y fueyes de cómic.

Además, con güeveres recortaes a mou de flor y pintaes con témpera, son un detalle bien prestosu pa colocar les típiques lluces de navidá y utilizales en cualquier folixa qu'organicemos pa decorar el sitiu.

Masaxe y relaxación y construcción d'instrumentos

El vienres pasáu tuvo llugar una vez más un taller de masaxe y relaxación. Notóse que yera la segunda vez, y que yá tamos formándonos nes diferentes técniques. Sabemos que la columna vertebral nun se toca, y que la espalda lo meyor ye que te al descubierto. Además, Lucía (la monitora) aprendiónos lo que yera la moxa y la so utilización.

El sábadu ficimos un taller de construcción d'instrumentos con materiales reciclables. Dos monitores de l'asociación ecoloxita d'Ixuxú vinieron al centru social de Soto Rei pa ofrecenos esti taller.

Yera la primer vez qu'Enredar s'acerca a les nueves instalaciones de Soto Rei. La verdá que l'afluencia mayoritaria de la mocedá foi de Soto, pero esperemos que poco a poco los mozos y moces de Soto Rei vayan animándose a participar, como lo ficieron nesta ocasión Pablo, Gonzalo y Pelayo.

Prósimu vienres y sábadu 23 y 24 d'ochore.

El prósimu vienres 23 d'ochobre nel salón d'actos de Soto Ribera: "Taller de masaxe y relaxación".

El prósimu sábadu 24 d'ochobre nel nuevu centru social de Soto Rei: "Construcción d'instruemntos de percusión".

Tornéu de fútbol sala

Aunque'l tornéu duró poco y paecía nun entamar con bon pie, fue intensu. Por problemes técnicos tuvimos que treslladanos a la pista de Soto Rei, onde s'apagaron les lluces a les 10 de la nueche.

El resultáu final, nun lu recuerdo, pero la verdá, que foi lo de menos.

Prósimu vienres 16 d'ochobre a partir de les 20:00h.

El prósimu vienres, 16 d'ochobre a partir de les 20:00h, tendrá llugar una competición de fútbol sala nel CP Pablo Iglesias. Pueden participar tolos mozos y moces del conceyu La ribera mayores de 12 años. Los quipos participantes tienen que tar formaos por integrantes de diferentes edaes, para que na competición nun haya diferencies importantes en cuanto a los resultaos.


Algunes miembros del CF Llosalín (únicu equipu de fútbol del conceyu) tarán nesti tornéu dando muestra del puxu que nos últimos años ta dando'l fútbol femenín.



¡¡¡Anímovos a toos/es a participar nesti tornéu!!!

Construcción y manexu d'oxetos malabares y acrobacies

El vienres pasáu, 9 d'ochobre, nel CP Pablo Iglesias de Soto Ribera, tuvimos construyendo palos chinos y carioques, y aprendiendo a manexales. Si queréis crear vosotros los vuestros propios oxetos malabares, pinchái equí.

Además, Larvy nos enseñó como manexar otros oxetos malabares como: boles, maces, diábolos, aros...

El sábadu, Larvy volvió a aprendenos un poco más d'acrobacies. Aunque gubo poca afluencia na asistencia, foi un taller mui interesante. Pa mi que d'esta hai algunu como Ramsés o Paulino que puen dir directos al circo. Manu y yo vamos reservanos pa facer fotos y vidios...

Entamen otra vez les actividaes

Col nuevu cursu escolar 2009/2010, entama otra vez Enredar en La Ribera, con nueves actividaes y talleres, de les que vos diré informando nesti blog o nel tuenti col mesmu nome qu'esti.

El vienres pasáu, 2 d'ochobre foi la primer actividá, con una competición de Play Station nel salón d'usos múltiples de Soto Ribera, y col aparticipación de 12 persones. El sábadu nun hubo actividá, porque ente les fiestes de Riosa, y la escursión a la Warner, nun díbemos tener afluencia de públicu.

Les siguientes actividades serán el vienres 9 d'ochobre y el sábadu 10 d'ochobre nel CP Pablo Iglesias de Soto Ribera.

El vienres, a partir de les 20:00h: CONSTRUCCIÓN Y MANEXU D'OXETOS MALABARES.

El sábadu, a partir de les 17:00h: ACROBACIES.


Esperamos vevos a toos/es ellí.

Construcción de darbukes

Taba'l día feu, mui feu, y el CF Llosalín nun pudo pasar del empate a ceros en Tudela Güeria. Acaba'l partíu, y a les 7 tábemos toos/es nel Salón d'Actos de Soto Ribera preparaos pa construyir darbukes.
Estefanía, mayestra de música, venía a dar el taller. Macetes, cola, papel cebolla y tisories yera'l material necesariu. Fani y yo facemos la cola. Los chavales garren les fueyes de papel cebolla, pártenles a la metá. Garren una y enllénenla bien de cola. Na otra posición, ponen la otra fueya, y a siguir untando... así hasta cuatro. Na parte d'arriba del tiestu hai que da-y bien de cola, y poner les fueyes bien moyaes. Agora, esperaremos a que seque.
Mientres, Fani tuvo aprendiéndonos diferentes toques cenciellos. Había algún artista que se nota que tien el ritmu nel cuerpu, y había otros como yo, que paecía más qu'imitaben el ruiu que fai un carru caballos al pasar que'l soníu rítmicu d'un cantar. Pero toos/es llogramos pasalo bien y aprender algo.
Como na última hora tovía nun hubieren secao les darbukes, algunos pensaron en personalizales y da-yos un toque de color.
Equí vos dexó'l vidiu que fai bon resumen de l'actividá.

Prósimu sábadu, 28 de marzu a les 20:00h

La darbuka o derbake (en árabe دربكة) es un instrumento de percusión de origen árabe usado en todo el Medio Oriente. Pertence al grupo de los tambores de copa. También suele ser llamado toballe ( se pronuncia tob-bale o tubale, especialmente en Palestina (región)), zarb y dumbek (o tombak), que deriva de los dos sonidos principales que forman la base de su técnica: un sonido grave (dum) y otro agudo (tac), además de los redobles, que en árabe se llaman harakat y se los nombra como "tákatak". En Egipto se lo llama Tabla, con una palabra árabe genérica para designar instrumentos de percusión.

El prósimu sábadu, 28 de marzu a les 20:00h nel Salón d'Actos de Soto Ribera: "TALLER DE CONSTRUCCIÓN DE DARBUKES".

Una maestra de música aprenderávos a facer la vuestra propia darbuka "casera". Una vez finalizada, aprenderéis los toques más básicos (o más difíciles, depende del vuestru oídu y habilidá que tengáis cola percusión).

Espero qu'esti cambiu de día y horariu nun seya una torga pa ningún de vosotros, y que toos podáis asistir al taller.

Vémonos allí entós ;).

Graffiti

Notóse l'interés de l'actividá. Quedamos a les 16:00, y media hora antes yá taben casi toos impacientes esperando en Ferreros. Los últimos en llegar fueron los monitores, pero en cuanto llegaron fuimos al sitiu que l'Ayuntamientu nos tenía preparao.

Un paré enorme pa espresar tolo que quisieren, polo menos hasta que los botes aguantaren. A pesar de los avisos nesti blog, a algunos costó-yos bastante pensar nun dibuxu, nunes lletres... aunque otros yá lo traíen bien pensao de casa.

Tras una breve esplicaicón de les técniques más básiques de pintar, y cola idea na testa de lo que diben dibuxar, punxéronse grupu a grupu manos a la obra.

Nesta foto podéis ver el resultáu final d'una tarde soleyera en Ferreros. Y nel vidiu, como fue'l procesu de decoración de la muria.

Prósimu sábadu, 14 de marzu de 2009.

La prósima actividá del programa Enredar de La Ribera, será'l taller de graffiti. Puesto que pa ello necesitamos lluz del día pa nun pintar a oscures, pasamos l'actividá pal sábado pela tarde. Vamos pintar onde'l tiru de Ferreros, y como nun sé si la mayoría sabréis onde ta eso, quedamos a les 15:45 nel bar de Ferreros pa dir toos xuntos pallá, onde ta la muria que l'Ayuntamientu nos dexa pintar. Si tenéis alguna duda, sabéis toos bien onde alcontrame pa preguntar lo que sea, y gustaríame que los que vais dir, m'aviséis, pa saber cuanto material necesitamos.

L'actividá será más o menos de 16:00h a 19:00h. Y dir pensando y dibuxando algo nun papel, que queráis que quede plasmao nes muries de Ferreros (un dibuxu, el vuesu nome...lo que vos pete). En pocos díes eses obres d'arte verán la lluz en forma de fotos y vidios nesti blog.

La xente que vien a aprendenos, pertenez al colectivu de graffiti Kritikal Worx, que tan en conxunta colaboración cola asociación Solokolo d'Uviéu.

"... montana es una religión. kritikal worx es nuestro credo, tus paredes guardan en secreto el placer que dan mis dedos, tiñete de tinta inferno Oviedo,robame otra noche el sueño pa enseñarte que no tienes dueño, y que amas las fat caps y el olor a gas de platas los tags acariciando tus fachadas... represento un sentimiento en llamas por los besos que mi nombre da en secreto a tus esquinas... (mosh,wue, etor, poch, skf)"

Xuegos tradicionales asturianos

A veces, cuando nun se dispón de material pa facer una actividá, hai que pensar en diferentes recursos que nun seyan los de dir a la tienda a gastar les perres (y más nestos tiempos de crisis) y utilizar los recursos que nos da l'entornu. Pa los xuegos tradicionales, nun ye difícil facese con ello. Nesti casu, yo voi da-y les gracies a mio güela, que en cinco minutos consiguiome más de 40 tarucos pa facer la carrera panoyes.

Respetando los equipos fechos yá dende'l día de la Play Station, la tarde, mui lluviosa por ciertu, empezó con unu de los xuegos populares más conocios por toos/es, como ye la rana, pa que fuesen calentando. Los equipos fueron los siguientes:

Equipu 1: Jorge, Cova, Laura, Lucía, Manuel y Javi.

Equipu 2: Paulino, Riki, Vero, Andrea, Belinda y Pelayo.

La rana: Utilizando la rana del CP Pablo Iglesias, tolos participantes dispusieron de 9 tiraes. Sólo Pelayo acertó a meter la ficha na boca la xaronca, pero fuera de la competición, lo que fizo que'l resultáu final fuera: Equipu 1: 55-20 Equipu 2.

Tiru-cuerda: Ficimos tres tiros, pero nun hubo manera de que l'equipu 1 pudiera facer algo. La cosa taba mui desigualada, y con Riki nel equipu 2, la cosa foi mui fácil. Equipu 1: 0-3 Equipu 2.

Dexabolu: ¿qué nun hai bolos? Pues reciclamos. Seis botelles de lleche, y un botellín d'agua (too asturiano tamién, claro), con un poco relleno (agua, tierra...). Los rapaces andaben desafinaos en cuanto a la puntería, y ni unu solu consiguió dexar un solu bolu en pie. Asina qu'hubo un empate claru: Equipu 1: 0-0 Equipu 1.

Concursu d'escanciadores: D'escanciadores d'agua, claro, col arte d'algún/a, nun podíemos desperdiciar sidra, y además, nun toos/es tan n'edá d'andar bebiendo. Sorprendente l'actuación de Belinda, que pa nun habelo fecho antes, paecía toa una esperta. Cada participante tenía que sacar polo menos 4 culinos de la botella, y echándolos nuna botella de plásticu, a ver quien llenaba más. Equipu 1: 1-0 Equipu 2.

Tiru al palu: Aunque nos faltaba la tabla onde apoyar los pies, usamos una pica de les de EF, y a tirar al palu. Ún d'un equipu contra otru, igualando más o menos fuerza y pesu. Equipu 1: 1-3 Equipu 2.

Baltu: Aunque la xente yera un poco reacia al principiu a lluchar. Nun se lo pensaron dos veces cuando vieron de que se trataba, y toos/es s'animaron a participar y midir les son fuercies y la so maña. Y nuevamente, cuando se trata de fuercia, l'equipu 2 volvió a ganar.

P'acabar la nueche, caún tuvo xugando a lo que-yos petara, unos al fútbol, otros a la rana, a la comba, a la peonza, al yo-yo...

El resultáu final de la xornada foi: Equipu 1: 3-3 Equipu 2.

Y los resultaos totales van así:

Equipu 1: 3

Equipu 2: 7

Prósimu vienres 6 de marzu de 2009

El prósimu vienres 6 de marzu, de 20:00h a 23:00h, nel CP Pablo Iglesias: COMPETICIÓN DE DEPORTES TRADICIONALES ASTURIANOS.

Los deportes y xuegos tradicionales tienen unes característiques mui variaes (deportes atléticos, de puntería, de fuerza, de bolos, de llucha, ...) y unes normes y técniques cencielles. D'esta forma, cualquier persona, seya cual seya la so condición física, pue participar, competir, ganar y pasalo mui bien, que ye lo importante.

Estos son algunos de los xuegos y deportes nos que vamos competir: la rana, el tiru al palu, la carrera panoyes, el dexabolu, el baltu...

Seguiremos colos mesmos equipos, y puntuando, así que nun vendas al to equipu y acércate a participar. Recuérdovos como van les puntuaciones y los equipos:

Equipu 1: Jorge, Ramsés, Cova, Laura, Lucía, Manuel, Alba, Rocío, Diego, Pablo, David y Tristán.

Equipu 2: Paulino, Riki, Vero, Andrea, Belinda, Pelayo, Sara, Jessica, David Alejandro, Josué y Luis.

Equipu 1 0-4 Equipu 2

¡Que nun se vos olvide llevar ropa deportivo!

Vémonos el vienres entós ;-)

Vidios

Yá tan colgaos, nes respeutives entraes los diferentes vidios de les actividaes. Pudiendo velos tamién nel youtube buscando: Enredar en La Ribera.

Acrobacies

La nueche nun empezó bien. Como dicía Manu (el cámara): tenemos fallos técnicos. Los plomos salten, y allí nun se ve ni pa echar un cantarín. Allí tuvieron, Larvy, Ramsés, Pelayo, Diego, Paulino... intentando arreglalo. Gracies a Ramsés pol móvil, y poder llamar a Patricia, que llamó a Lito y acudió rápidamente solucionándonos el problema.
Yá habíen pasao casi 20 minutos, y medio a oscures, habíen empezao les primeres acrobacies. Estes yeren les del calentamientu, les más simples, y yá había a algunu al que se-y resistíen.
Yá iluminaos, entamamos coles volteretes. Con saltos, ensin manos, cayendo de pie... Bueno, eso pal que sabía, porque yo con una voltereta de les de tola vida yá taba más que contenta.
Les voleteretes por pareyes, paecíen más fáciles y asequibles pa torpes como yo, pero la gravedad atraía poderosamente los culos y nun nos dexaba impulsános debidamente.
Ente pirueta y pirueta algunu s'animó tamién colos malabares: pelotes, maces, aros, diábolo... Mirái esti enllaz: http://www.youtube.com/watch?v=FWhzKtlpFOI
Antes de que s'acabaren toles bateríes de cámares, quisimos facer una pirámide. Llamaime inútil, pero esa cacho colchoneta nun me dexaba impulsame. Dempués de múltiples intentos, y sin ningún lesionáu, la pirámide salió.

Larvy intentó que ficiéramos alguna torre humana. Y alguna salió, pero la mayoría preferíen tirase nes colchonetes y dar piruetes. Así que hubo un concursu de saltos, del cual elimináronme inxustamnete, yá que yo nun toqué la cuerda (naide dixo que nun se pudiera pasar por debaxo). Aunque Diego-y lo puso mui difícil, el ganador, claramente, fue Riki, que nació pa circense.
Más de dos hores de saltos, acrobacies, piruetes... son matadores, así que mientres la mayoría taben azotaes poles colchonetes descansando, algunos tuvieron aprendiendo unes llaves de defensa personal (o más bien, Presin cach).
Munches gracies a Larvy pola dedicación y la paciencia, polo aprendío, polo arriesgao. Un taller diferente, lúdicu, didácticu y entreteníu.

Prósimu vienres 27 de febreru

El prósimu vienres 27 de febreru, de 20:00h a 23:00h, nel Polideportivu del CP Pablo Iglesias de Soto, tendrá llugar un taller d'acrobacies y acrosport.

L'acrosport ye un deporte acrobáticu-coreográficu onde s'integra tres elementos fundamentales:

• Formación de figures o pirámides corporales.
• Acrobacies y elementos de fuerza, flexibilidá y equilibrios como transiciones d'una figura a otres.
• Elementos de danza, saltos y piruetes ximnástiques como componente coreográficu, que le otorga a esti deporte'l grau d'artísticu.

L'acrobacia ye cada unu de los exercicios ximnásticos o d'habilidá que realiza un acróbata: equilibrios, saltos, xiros, etc.
Les acrobacies son una parte importante del acrosport.
Pueden entendese les acrobacies fuera del acrosport pero non l'acrosport sin acrobacies. Hai diferentes tipos d'acrobacies.

1. Acrobacies individuales:

• Con oxetos (pelotes, malabares, antipodismo, aparatos, materiales ximnásticos...).
• Sin oxetos.
• Mediu acuáticu.
• Mediu aéreu.
• Mediu terrestre.

1. Acrobacies grupales:

• Con oxetos (pelotes, malabares, antipodismo, aparatos, materiales ximnásticos...).
• Sin oxetos.
• Mediu acuáticu.
• Mediu aéreu.
• Mediu terrestre.

Que naide tenga mieo, porque esta ye una actividá onde cada persona ye importante: les fuertes, les débiles; les grandes, les pequeñes; les que pesen más, les que pesen menos; les áxiles, les torpes; les creatives, les inxenioses... Toos/es teníes un papel importante dentro de les acorbacies grupales.

Recordái que ye importante que llevéis ropa cómodo que nun vos ponga torgues al movimientu.

Vémonos el vienres entós.

Taller de masaxe y relaxación

Pese a lo que dicen les estadístiques, paez que la mocedá de La Ribera nun tien stress, yá qu'esti taller, hasta'l momentu, foi unu de los menos numerosos. Pero los que nun fueron ¡¡nun saben lo que se perdieron!!

Lucía, la monitora especializada, nun llegaba hasta les 21:00h, asina que la primer hora tuvimos xugando al Trivial y al Jenga (buenu, y riñendo un poco, qu'algunu andaba algo atravesáu).

Lo primero, que paez que nadie llee esti blog, ni la páxina del Ayuntamientu, porque nengunu de los asistentes llevó toballes nin esterilles ni nada. Menos mal que yo sabía qu'eso podría pasar, y llevé yo algunes.

Lucía mandónos ponenos por pareyes. La primer hora tuvi dándo-y masaxe a Vero, Alba a Belinda, Andrea a Lucía y Jorge a Paulino. El sector femenín, poco a poco consiguió relaxase y tar en silenciu, pero al sector masculín costó-yos más ¿Jorge qué-y facíes a Paulino, un masaxe o una tortura?.

La segunda hora, los masaxeaos, pasaron a ser maxasistes y viceversa. Pringámonos bien d'aceite, calecimos les manes, y a manosear les espaldes, sin mieo a calcar, que se noten les contractures, y agora percusiones, y depués coles falanxes, y ... ¿qué más aprendimos?

Munches gracies a Lucía, la monitora, por tolo que nos enseñó y polo bien que lo fizo.

Prósimu vienres 13 de febreru

Esti viernes tendrá llugar, de 20:00h a 23:00h nel salón d'actos del edificiu d'usus múltiples de Soto Ribera un taller de Masaxe y Relaxación p'adolescentes.

El taller consistirá n'aprender alguna técnica de masaxes de relaxación que pondréis en práctica colos vuestros compañeros. ¡Y nun vos preocupéis, que toos/es seréis masaxeaos y masaxistes!

Pa los/es asistentes al taller, sería coveniente que llevarais ropa cómodo, cola que nun vos de más tiravos en suelu. Además d'una esterilla pa que teis más cómodos tiraos en suelu(tamién valdría una manta o toballa) y una toballa pequeña, pa que nun vos manchéis la ropa cola crema.

Espero vevos a toos/es allí con ganes d'olvidar les hores de clase, d'esámenes, d'aguantar padres y profesores...de toda esta estresante selmana.

Competición deportiva

El pasáu vienres 30 de xineru, de 20:00h a 23:00h, tuvo llugar nel polideportivu del CP Pablo Iglesias una competición deportiva con una gran acoyida de participantes. Los equipos enfrentaos fueron estos:

• Equipu 1: Jorge, Ramsés, Cova, Laura, Lucía, Manuel, Diego, Pablo, David y Tristán.
• Equipu 2: Paulino, Riki, Vero, Andrea, Belinda, Pelayo, David Alejandro, Josué y Luis.

En primer llugar enfrentáronse a baloncesto, con dos partes d'una duración de 15min caúna. La primer mitá, el partíu tuvo bastante igualao, pero na segunda los de Paulino pusiéronse les piles con un resultáu final de 16-2 a favor del equipu 2.

Como suel pasar, el fútbol yera el deporte más esperáu, y por ello la duración del partíu fue de media hora cada parte, pa que los/es xugadores pudieren demostrar la so calidá col balón nos pies. Asemeyao al baloncesto, la primer mitá tuvo bastante igualada, pero fue tras el descansu, que les lesiones d'algunes pieces clave del equipu 1, foi baxando'l rendimientu d'estos, acabando'l partíu con un contundente 13-4 a favor de los de Paulino. Como parte positiva del alcuentru, y barriendo pa casa, destacar l'actuación d'algunes muyeres que dexaron constancia de nun tener na qu'envidiar a los homes nesti deporte, y la deportividá d'ambos equipos. Como parte negativa, la mala forma física de la mayoría de los particiantes, que a lo cabero del partíu taben cola llingua en suelu y pidiendo'l tiempu.

Y pa finar la competición, algo más seliquino, el voleibol. Namás dio tiempu a xugar un set, y tuvo más que reñíu hasta'l final, ganando nuevamente, y pola mínima l'equipu 2. Destacar el llabor de Cova que fue la única capaz de poner algo de traza al partíu colocando a los sos collacios. Y la inutilidá xeneralizada de toos/es, que nun sé si ye que yá les fuercies flaqueaben dempués de tres hores de deporte intensivu, o que nunca habíen visto un red de voleibol na so vida.

Quería dende equí dar les gracies al CP Pablo Iglesias por nun poner nengún empedimentu pa dexanos tanto'l polideportivu como'l material deportivu de l'actividá. Amás dar les gracies a los participantes por aídame a prender/apagar les lluces, baxar/xubir les canastes, poner/quitar la red. Y felicitar a toos/es pola deportividá demostrada en tola competición y la paciencia pa cola árbitro, que foi ensin nenguna dulda, la peor de la xornada.

Y pa finar, una pequeña riña pa toos/es: ¡¡hai que dexar el sitiu onde temos, como lo topemos o meyor, los papeles y botelles d'agua, a la papelera!!

Colaborando

Ta claro que pa qu'esto salga bien, necesítase la colaboración de toos/es. Tanto participando nes actividaes, como nel blog, como aportando idees... o lo que seya.

Equí vos dexo un montaxe que fizo Ramsés sobre'l día de la Play Station y que quiso compartir con toos/es. Espero que vos preste.

Play Station

El vienres 23 de xineru de 2009 entamaron de nuevu les actividaes d'Enredar con alguna novedá (como l'ausencia de Seila como monitora, qu'esperamos que venga a venos algún día), pero con munches ganes.

Antes d'entamar con ello, tuvimos entre toos/es concretando les actividaes que más-yos prestaría facer, y ficimos dos equipos que competirán en parte de les actividaes que se desarrollarán. Los equipos, escoyíos por Paulino y Jorge, fueron estos:

• Equipu 1: Jorge, Ramsés, Cova, Laura, Lucía, Alba y Rocío.
  
• Equipu 2: Paulino, Riki, Vero, Andrea, Belinda, Sara y Jessi.

L'actividá realizóse de 8 a 11 nel salón d'actos, recientemente renováu con un cañón nuevu, onde la calidá de la imaxe de la Play yera perbona.

Ramsés llevó la Play y los xuegos, y Paulino un mandu y algún xuegu. Y nun vos voi a engañar, que yo nun tengo ni idea ni de cables ni de Play Station, asina qu'ente Riki y Ramsés enchufaron l'aparatu pa que too funcionara a la perfección.

Tuvieron xugando a un xuegu de fútbol y a unu de coches, (agradecería qu'algún de vosotros punxera algún comentariu de como se llamaben los xuegos, porque ando algo despistada). Y mientres unos xugaben colos mandos, otros miraben y otros entreteníense xugando a algún xuegu de mesa (al Jenga, los paliellos chinos o el Trivial).

Lo que ta claro, ye que l'equipu 2 impúsose claramente nos dos xuegos, y sumó el so primer puntu nesta competición.

¿Qué pasará'l prósimu día?

Navidá 2008

Además d'estes actividaes p'adolescentes, l'Ayuntamientu de La Ribera tamién organizó durante los díes 22, 23, 29 y 30 d'avientu talleres pa los más peques del conceyu. Les monitores, Sandra y Seila (tamién del conceyu) ficieron que les mañanes de los neños fueran diferentes: adornaron la sala con motivos navideños, ficieron marionetes, inventaron hestories nes que los personaxes yeren les sos marionetes, ficieron marcos de fotos, ... y pa concluir les actividaes una esposición de les manualidaes y una gran fiesta con música, globoflexia, pintura de cara y piscolabis.
Dende esti espaciu un saludu pa Nerea, Celia, Alba, Andrea, Víctor, Illán, Rubén, Sara y Ana que trabayaron mui bien esos cuatros díes.

Presentación

La Ribera ye un conceyu de la zona centru d'Asturies, y bastante desconocíu. Tamos a 7km d'Uviéu y Mieres (sí, ahí onde les chimenees, pa que vos ubiquéis). Y esta ye la páxina web del Ayuntamientu: http://http//www.riberadearriba.org/www/main/index.php.

Por primera vez, nesti Ayuntamientu, púsose en marcha'l programa Enredar. Trátase d'un programa d'actividaes diferentes, siempre divertíes, pensaes pa la mocedá. Porque pue dise de marcha de munches formes.

Les actividaes faense en Soto Ribera, principalmente nel salón d'actos del edificiu d'usus múltiples del ayuntamientu o nel polideportivu del CP Pablo Iglesias.

A finales de 2008 realizáronse actividaes como paintball, bailes de salón, teñío de camisetes, risoterapia, fiesta de Halloween, circuitu de cars, cocina creativa, cócteles ensin alcohol, coches teledirixíos, scalextri y malabarismos.

Nesti 2009 que ta empezando, habrá nueves y divertíes actividaes: Play Station, competiciones deportives, deportes tradicionales, masaxe y relaxación, graffitis, construcción de darbuques, ...

Nun dexes de pedir información nel Ayuntamientu ¡De xuru que t'enredes!

Verónica, Lucía, Alba, Manuel y Andrea na fiesta de Halloween